4 ნოემბერი 19:00   კინოთეატრი ამირანი

გაუჩინარებული ეკრანი და ვიზუალური არქივი, ფანჯარა წარსულში: 90-იანი წლების ყოფის პორტრეტი

მიმდინარე პროცესების ვიზუალურად აღბეჭდვის, დაფიქსირების სურვილი. რეალობის ფრაგმენტულად, კრიტიკულად მოხელთების, სიღრმისეულად თუ იუმორით გააზრების სხვადასხვა მცდელობა. ფეხბურთი და მისი კვალი მიმდინარე პროცესებში, იდენტობის ფორმირებასა თუ საერთოობის განცდაში, საქართველოს პირველი ეროვნული ჩემპიონატი, რიგები და ცარიელი დახლები, ინტერვიუები ახალგაზრდებთან, მათ შეხედულებებსა და უბრალოდ თავის შექცევის, გართობის საშუალებაზე დაკვირვება, სიკვდილის წინ ჩაწერილი ინტერვიუ მერაბ მამარდაშვილთან. მსჯელობა და რეფლექსია, იმედი და უიმედობა, დაბნეულობა, დასმული კითხვები გზამკვლევის როლსაც ასრულებენ ამ ფილმებსა და ამ პერიოდში არსებულ რეალობაში. გულწრფელი მოსაზრებები და დაკვირვებები, ვიზუალური მეხსიერება, არქივი და ადამიანების სახეები წინა საუკუნიდან.

მოკლემეტრაჟიანი ფილმები: 82 წთ

კინოჟურნალი „ადამიანი და კანონი“ N 81 

ავტორები: რ. ხუნწარია, გ. როგავა, ვ. ბეგოიძე, ზ. ფურცელაძე, გ. გარსევანიშვილი, ლ. ბოკერია

10 წთ / 1991 

მაღაზიები, რიგები, დაცარიელებული დახლები, პროდუქტების გაყიდვის შესაძლებლობა და შეუძლებლობა.

გზა შინისაკენ - მერაბ მამარდაშვილი 

რეჟ. ნიკოლოზ დროზდოვი

19 წთ / 1990 

მერაბ მამარდაშვილის რეფლექსია იმ დროის მიმდინარე პროცესებზე. 

გაიცანით, ჩვენი შვილები 

რეჟ. ომარ გვასალია 

24 წთ / 1988

ახალგაზრდები სკეიტბორდებით, ინტერვიუები მათთან სოციალურ საკითხებზე, ყოფაზე. 

გვჭირდება თუ არა საბჭოთა კავშირის პირველობა ფეხბურთში 

რეჟ. ალექსანდრე ჟღენტი

29 წთ / 1991

იწყება საქართველოს პირველი ეროვნული ჩემპიონატი. ფეხბურთის როლი და ადგილი იდენტობის ძიებაში. ადამიანების გამაერთიანებელი ძალა.

სამშაბათი 12 ნოემბერი 19:00   კინოთეარი ამირანი

ზაჰესი 708 

რეჟ: თამუნა ქარუმიძე

48 წთ / 2001 

"ზაჰესი 708" 1990-იანებსა და 2000-იანებს შორის, ფილმებით ორი ათასწლეულის მიჯნაზე ტრავმული, ბნელი ოთხმოცდაათიანების გამოცდილებიდან თავის დაღწევის, ახალი საზოგადოებრივი წესრიგისთვის საფუძვლის ჩაყრის სურვილს და ამ სურვილის განხორციელების პროცესს ასახავს. თამუნა ქარუმიძე თავისუფალი, მსუნთქავი კამერით აღბეჭდავს მეოცედან ოცდამეერთე საუკუნეში გარდამავალ თბილისს და სტაგნაციით მოცულ, დამანგრეველი 90-იანების გამოცდილებით მცხოვრებ ქალაქში ახალგაზრდა ხელოვანთა თვითგამოხატვის დაუოკებელ სურვილს ასახავს.

Q&A რეჟისორთან

სამშაბათი 19 ნოემბერი 19:00   კინოთეატრი ამირანი

ქალების პორტრეტები 90-იანი წლების საქართველოდან (I ნაწილი)

განსხვავებული ქალები, განსხვავებული პორტრეტები, რუტინული, პოლიტიკური, ამაღელვებელი, მშვიდი, პოეტური - გადარჩენისთვის, ადგილისთვის, განათლებისთვის, შემოქმედებისთვის ბრძოლის აჩრდილით 90-იანი წლების საქართველოს არქივიდან. ქალების შთამბეჭდავი ვიზუალური პორტრეტი, ფორმითა და სათქმელით - გამქრალი სახეები და ისტორიები ბრუნდება ეკრანზე.

მე ვარ და ჩემი ნაბადი

რეჟ. მიხო ბორაშვილი, ი. ვაჩნაძე

10 წთ / 1990 

სამეგრელოს სოფელში სახლის ეზოში შეკრებული ქალები ამუშავებენ მატყლს. ქალების შრომისა და ყოველდღიური ყოფა, მოძრაობების ქორეოგრაფია, საუბრებები, ფრაგმენტები მათი ცხოვრებიდან. კამერა ხან შორიდან, ხანაც ახლოდან პოეტურად აკვირდება მათი ფუსფუსის და ერთობლივი შრომის მაგიას.

ნინიკო

რეჟ. მიხო ბორაშვილი

10 წთ / 1990 

პატარა გოგონას ამბავი რაჭის სოფლიდან, მისი რუტინა, ყოფა, სკოლაში მისვლა, სადაც კლასში ერთადერთი მოსწავლეა და ყველა მასწავლებელი მხოლოდ მას ერთს უტარებს გაკვეთილებს. 

პრივილეგია პრივილეგიის გარეშე

რეჟ. ნიკოლოზ კუზანოვი

10 წთ / 1990

მრავალშვილიანი ოჯახები საქართველოში, გამოკითხვა ქუჩაში და ფრაგმენტები ყოველდღიური ცხოვრებიდან. 

სარკმელი

რეჟ. ბორის მარგველაშვილი

20 წთ / 1990 

მხატვარ ქეთევან ფორაქიშვილის სამყაროს თავისებური მოხელთების მცდელობა, მისი ნამუშევრები, სამუშაო გარემო, საუბარი, ექსპრესიული პორტრეტი და რეჟისორის ვიზუალური და აკუსტიკური ექსპერიმენტები. 

სამშაბათი 26 ნოემბერი 19:00   კინოთეატრი ამირანი

ხიდი 

რეჟ: ნინო ორჯონიკიძე, ვანო არსენიშვილი

35 წთ / 2005

„ხიდი“ ენგურის ხიდზე დაკვირვებით და ნაირსახობრივი გამომხატველობის ხერხებით სწავლობს ომით დაზარალებულთა ტრავმულ გამოცდილებებს, ამ გამოცდილებათა აფექტურ შრეებს და მათ გავლენას პერსონაჟების პოსტ-ტრავმულ ცხოვრებაზე.

ალცნეი 

რეჟ: ნინო ორჯონიკიძე, ვანო არსენიშვილი

30 წთ / 2009

„ალცნეი“ პატრიარქალურ საზოგადოებაში განსაკუთრებული შუამავლის როლის მქონე უხუცეს ქალზეა, რომლის ცხოვრების საზრისს სხვათა პრობლემების მოგვარება, შუამავლობა წარმოადგენს და რომელიც სხვების სირთულეებზე გამარჯვებას საკუთარ ტრიუმფად აქცევს.

Q&A რეჟისორებთან 

ჩვენება გაუქმებულია ქვეყანაში მიმდინარე მოვლენების გამო

ქალების პორტრეტები 90-იანი წლების საქართველოდან (II ნაწილი)

განსხვავებული ქალები, განსხვავებული პორტრეტები, რუტინული, პოლიტიკური, ამაღელვებელი, მშვიდი, პოეტური - გადარჩენისთვის, ადგილისთვის, განათლებისთვის, შემოქმედებისთვის ბრძოლის აჩრდილით 90-იანი წლების საქართველოს არქივიდან. ქალების განსხვავებული ამბები, ფრაგმენტები მათი ყოფიდან, შრომა, სოლიდარობა, ხელოვნება, სხვადასხვა ისტორიები - სოციალური აქცენტებითა და რეალობაზე რეფლექსიით. როგორ ცხოვრობენ, რასთან უწევთ გამკლავება რთული სოციალურ-პოლიტიკური ვითარების დროს, რას განიცდიან, როგორია მათი ყოველდღიურობის ანაბეჭდი. 

ქალები

რეჟ. ვაჟა ზუბაშვილი

25 წთ / 1990

სხვადასხვა ქალების პორტრეტები, მათი საუბარი, მონოლოგები და ფრაგმენტები ცხოვრებიდან. დირექტორი ქალი, მუსიკოსი ქალი, მეოცნებე ქალი, თანამოაზრე ქალები, ყოველდღიურ რუტინასთან და ოცნებებთან შეზრდილი პორტრეტები, მათ ცხოვრებასთან დაკავშირებული გამოწვევები, მოლოდინები, შეგრძნებები და სურვილები. რაზე ფიქრობენ? რას გრნობენ, რას და როგორ უმკლავდებიან 90-იანი წლების საქართველოში? საუკუნეების მიჯნაზე მოხელთებული მათი სახეები ამაღელვებელიცაა და საინტერესოც, ბევრის მთქმელიც იმ გარემოზე, სადაც არიან.

მანდილოსნები

რეჟ. მარინა გეგენავა

10 წთ / 1985

კვლავ ქალების შრომის, ყოფის საკითხები, პორტრეტები, მრავალშვილიანი დედების ცხოვრების სირთულეები და გამოწვევები.

ქალის პორტრეტი

რეჟ. ოთარ გურგენიძე

15 წთ / 1987

მოცეკვავე იამზე დოლაბერიძის პორტრეტი და მისი სამყარო.

ჩვენება გაუქმებულია ქვეყანაში მიმდინარე მოვლენების გამო

ამერიკა ერთ ოთახში

რეჟ: დავით კანდელაკი

53 წთ / 2007

ამერიკის ციხის უდანაშაულო ქართველ მსჯავრდებულზეა „ამერიკა ერთ ოთახში“ (დავით კანდელაკი, 2007), რომელშიც 90-იანების ტრავმასა და განუკითხაობას გაქცეული კაცის ფსიქო-ემოციურ პორტრეტსა და მისი მდგომარეობის აბსურდულობას რეჟისორი ოთხ კედელში გამომწყვდეული პერსონაჟის ხმის ნიუ იორკის კადრებთან სინთეზში აღბეჭდავს.

ჩვენება გაუქმებულია ქვეყანაში მიმდინარე მოვლენების გამო

რა თქმა უნდა, ამერიკაში! 

რეჟ. ნინო ფურცხვანიძე, პიტერ იან სმიტი

76 წთ / 2009

ფილმში „რა თქმა უნდა, ამერიკაში“, რომელშიც საზღვრების გარღვევა ტრავმასა და უიმედობაზე გამარჯვების, ცხოვრების თავიდან დაწყების სინონიმია, განსაკუთრებული ნიუანსურობითაა აღწერილი აშშ-ში არალეგალურად შეღწევის, იქაურ რეალობაში თავის დამკვიდრებისა და ემიგრაციასთან დაკავშირებული ბიუროკრატიული სირთულეების აფექტურ-ემოციური პერიპეტიები.

ჩვენება გაუქმებულია ქვეყანაში მიმდინარე მოვლენების გამო

გაუნათებელი სინათლე POWER TRIP

რეჟ: პოლ დელვინი Paul Devlin

85 წთ / 2003

„გაუნათებელი სინათლე" ხიდია 1990-იანებსა და 2000-იანებს შორის, ორი ათასწლეულის მიჯნაზე ტრავმული, ბნელი ოთხმოცდაათიანების გამოცდილებიდან თავის დაღწევის, ახალი საზოგადოებრივი წესრიგისთვის საფუძვლის ჩაყრის სურვილს და ამ სურვილის განხორციელების პროცესს ასახავს. პოლ დევლინი უშუქობის პრობლემაზე კონცენტრირდება და ამ პრობლემაზე გამარჯვების პროცესს ნიუანსური აუდიოვიზუალური სტილით აღწერს. ფილმი AES-თელასის თანამშრომლების მუშაობას აღწერს იმ დროს, როდესაც ელექტროენერგიის გადასახადს თითქმის არავინ იხდის, ქვეყანაში გავრცელებულია კორუფცია და ელექტროენერგიის უწყვეტი მიწოდება დიდ გამოწვევას წარმოადგენს.  

Q&A ფილმის ოპერატორთან, მემონტაჟესთან და ქართველ პროდიუსერთან ვალერი ოდიკაძესთან